ಉಪ್ಪಾರ ನೌಕರರಿಂದ ಪ್ರತಿಭಾ ಪುರಸ್ಕಾರ

ಹರಪನಹಳ್ಳಿ: ಹಬ್ಬ ಹರಿದಿನಗಳ ಆಚರಣೆಯಲ್ಲಿ ಮೇಲ್ವರ್ಗದ ಸಮುದಾಯಗಳಿಗಿಂತ ಶೋಷಿತ ವರ್ಗದವರೇ ಹೆಚ್ಚು ದುಂದುವೆಚ್ಚ ಮಾಡುತ್ತಿರುವುದು ಕಳವಳಕಾರಿ ಸಂಗತಿಯಾಗಿದ್ದು, ಇದಕ್ಕೆ ತಕ್ಷಣ ಕಡಿವಾಣ ಬೀಳಬೇಕಿದೆ ಎಂದು ಹೊಸದುರ್ಗ ಮಧುರೆಯ ಭಗೀರಥ ಪೀಠದ ಡಾ. ಪುರುಷೋತ್ತಮಾನಂದಪುರಿ ಸ್ವಾಮೀಜಿ ಅಭಿಪ್ರಾಯಪಟ್ಟರು.

ಪಟ್ಟಣದ ರೇಣುಕಾಚಾರ್ಯ ಕಲ್ಯಾಣ ಮಂಟಪದಲ್ಲಿ ಭಾನುವಾರ ತಾಲೂಕು ಉಪ್ಪಾರ ನೌಕರರ ಸಂಘaದ ವತಿಯಿಂದ ಆಯೋಜಿಸಿದ್ದ ಪ್ರತಿಭಾನ್ವಿತ ವಿದ್ಯಾರ್ಥಿಗಳಿಗೆ ‘ಪ್ರತಿಭಾ ಪುರಸ್ಕಾರ’ ಹಾಗೂ ಬಡ್ತಿ ಮತ್ತು ನಿವೃತ್ತಿ ನೌಕರರ ಸನ್ಮಾನ ಸಮಾರಂಭದ ಸಾನ್ನಿಧ್ಯ ವಹಿಸಿ ಅವರು ಆಶೀರ್ವಚನ ನೀಡಿದರು.

ಮಕ್ಕಳಿಗೆ ಸಂಸ್ಕಾರಯುತ ಜೀವನ ಅಗತ್ಯ
“ಇಂದಿನ ಮಕ್ಕಳಲ್ಲಿ ತಾಳ್ಮೆ ತೀರಾ ಕಡಿಮೆಯಾಗಿದೆ. ಮೊಬೈಲ್ ಕೊಡಿಸದಿದ್ದರೆ ಅಥವಾ ಆಸೆಗಳು ಈಡೇರದಿದ್ದಾಗ ಆತ್ಮಹತ್ಯೆಯಂತಹ ದುರಂತ ನಿರ್ಧಾರಕ್ಕೆ ಕೈಹಾಕುತ್ತಿರುವುದು ದುರಂತ. ಇಂತಹ ಅನಾಹುತಗಳು ಸಂಭವಿಸುವ ಮುನ್ನವೇ ಪೋಷಕರು ಬಾಲ್ಯದಲ್ಲೇ ಮಕ್ಕಳಿಗೆ ಸಂಸ್ಕಾರಯುತ ಜೀವನವನ್ನು ರೂಪಿಸಬೇಕು” ಎಂದು ಸ್ವಾಮೀಜಿ ಕಿವಿಮಾತು ಹೇಳಿದರು.

“ಮಾಹಿತಿ ತಂತ್ರಜ್ಞಾನ ಬೆಳೆದಂತೆ ಮಾನವೀಯ ಮೌಲ್ಯಗಳು ಕಣ್ಮರೆಯಾಗುತ್ತಿವೆ. ರಸ್ತೆ ಅಪಘಾತಗಳಲ್ಲಿ ಬಹುತೇಕ ಸಾವುಗಳು ಮೊಬೈಲ್ ಬಳಕೆಯಿಂದಲೇ ಸಂಭವಿಸುತ್ತಿವೆ. ಅವಿಭಕ್ತ ಕುಟುಂಬಗಳು ದೂರವಾಗುತ್ತಿರುವುದು ಸಮಾಜಕ್ಕೆ ಆತಂಕಕಾರಿ ಬೆಳವಣಿಗೆಯಾಗಿದೆ. ತಮ್ಮ ತಪ್ಪನ್ನು ಮರೆಮಾಚಲು ‘ಕಾಲ ಬದಲಾಗಿದೆ’ ಎನ್ನುವುದು ಕುಂಟು ನೆಪವಷ್ಟೇ. ಋತುಮಾನಗಳು ಸರಿಯಾಗಿಯೇ ನಡೆಯುತ್ತಿವೆ; ನಮ್ಮ ಮನಸ್ಥಿತಿ ಬದಲಾಯಿಸಿಕೊಂಡರೆ ಸಮಾಜವನ್ನು ನೋಡುವ ದೃಷ್ಟಿಕೋನವೂ ಭಿನ್ನವಾಗಿರುತ್ತದೆ” ಎಂದರು.

ಸ್ವಾಭಿಮಾನದ ಬದುಕು ರೂಪಿಸಿಕೊಳ್ಳಿ
ಕ್ಷೇತ್ರ ಶಿಕ್ಷಣಾಧಿಕಾರಿ (ಬಿಇಒ) ಎಚ್. ಲೇಪಾಕ್ಷಪ್ಪ ಮಾತನಾಡಿ, “ಯಶಸ್ಸು ಗಳಿಸಲು ಅಹಂಕಾರ ತ್ಯಜಿಸಿ, ದೃಢ ನಿರ್ಧಾರ ತಳೆಯಬೇಕು. ನಾವು ಯಾವ ಸಮಾಜದಲ್ಲೇ ಹುಟ್ಟಿರಲಿ, ಅದರ ಬಗ್ಗೆ ಚಿಂತಿಸದೆ ಉತ್ತಮ ಶಿಕ್ಷಣ ಪಡೆದರೆ ಭವಿಷ್ಯದ ಜೀವನ ಸಂತೋಷದಿಂದ ಕೂಡಿರುತ್ತದೆ. ಜಗತ್ತಿನ ಬಹುತೇಕ ಮಹಾನ್ ಸಾಧಕರು ದೃಢ ಸಂಕಲ್ಪದೊಂದಿಗೆ ಬ್ರಾಹ್ಮೀ ಮುಹೂರ್ತದಲ್ಲೇ ದಿನಚರಿ ಆರಂಭಿಸಿ ಇತಿಹಾಸ ಬರೆದಿದ್ದಾರೆ” ಎಂದರು.

“ಮಾನಸಿಕ ದೃಢತೆ, ಅಂತರಂಗದಲ್ಲಿ ಕರುಣೆ, ಗುರು-ಹಿರಿಯರಿಗೆ ಗೌರವ ಕೊಡುವ ಭಾವನೆ ಹಾಗೂ ಉತ್ತಮ ಸ್ನೇಹಿತರ ಒಡನಾಟ—ಈ ನಾಲ್ಕು ಸೂತ್ರಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡವರು ಸೋತ ಇತಿಹಾಸವಿಲ್ಲ. ಯಾರ ಮೇಲೂ ಅವಲಂಬಿತರಾಗದೆ ಸ್ವಾಭಿಮಾನದಿಂದ ಬದುಕುವುದನ್ನು ಕಲಿಯಬೇಕು” ಎಂದು ಕರೆ ನೀಡಿದರು.

ಕಾರ್ಯಕ್ರಮದಲ್ಲಿ ಉಪ್ಪಾರ ನೌಕರರ ಸಂಘದ ರಾಜ್ಯಾಧ್ಯಕ್ಷ ಎಸ್.ಎನ್. ಚಂದ್ರಪ್ಪ, ತಾಲೂಕು ಅಧ್ಯಕ್ಷ ಕೆ. ಅಂಜಿನಪ್ಪ, ಪ್ರಮುಖರಾದ ತಿಮ್ಮಪ್ಪ ಕೆ., ಜಿ. ಮಂಜಮ್ಮ ಹನುಮಂತಪ್ಪ, ಹನುಮಂತಪ್ಪ ಎನ್.ಪಿ., ವಾಣಿ ಕೆ.ಎಚ್., ಎ. ಮಂಜುನಾಥ, ಯು. ಕರಿಬಸಪ್ಪ, ಅಂಜಿನಪ್ಪ ಪಿ., ಗಿರಿಜಾ ಎಂ., ರಾಜಪ್ಪ ಯು., ಗಣೇಶ್, ಕಾಡಜ್ಜಿ ಮಂಜುನಾಥ, ಪ್ರಕಾಶ್ ಯು., ಹನುಮಂತಪ್ಪ ಡಿ., ಲಕ್ಷ್ಮೀದೇವಿ, ಟಿ. ಗೌರಮ್ಮ, ಹುಚ್ಚಪ್ಪ ಬಣಕಾರ, ಯು. ಸಿದ್ದಪ್ಪ, ಜಿ.ಎಸ್. ವೆಂಕಟೇಶ್, ರಾಜಪ್ಪ ಶಂಕರನಹಳ್ಳಿ, ಸೋಮಪ್ಪ ಯು., ಪರಶುರಾಮ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.