ಒನಕೆ ಓಬವ್ವ ಅಸಾಮಾನ್ಯ ಸಾಹಸಿ

ಹರಪನಹಳ್ಳಿ : ಸಾಮಾನ್ಯ ಗೃಹಿಣಿಯಾಗಿದ್ದ ಒನಕೆ ಓಬವ್ವ ಅಸಾಮಾನ್ಯ ಸಾಹಸ ಬೆಚ್ಚಿ ಬೀಳಿಸುತ್ತದೆ ಎಂದು ಕೊಟ್ಟೂರು ಸರ್ಕಾರಿ ಪಿಯು ಕಾಲೇಜ್ ಉಪನ್ಯಾಸಕ  ಜಿ.ಕರಿಬಸಪ್ಪ ಹೇಳಿದರು.

ನಗರದ ತಾಲ್ಲೂಕು ಆಡಳಿತ ಸೌಧದಲ್ಲಿ ಜರುಗಿದ ಒನಕೆ ಓಬವ್ವ ಜಯಂತಿ ಸಮಾರಂಭದಲ್ಲಿ ಅವರು ಉಪನ್ಯಾಸ ನೀಡಿದರು. ಗುಡೆಕೋಟೆ ಪಾಳೆಗಾರರಲ್ಲಿ ಕಹಳೆಯವರಾಗಿ ಸೇವೆ ಸಲ್ಲಿಸುತ್ತಿದ್ದ ಛಲವಾದಿ ಜನಾಂಗದ ಚೆನ್ನಪ್ಪನ ಮಗಳಾಗಿ ಜನಿಸಿದ್ದ ಓಬವ್ವ ಸ್ವಾಮಿನಿಷ್ಠೆ, ಸಮಯಸ್ಪೂರ್ತಿ, ತ್ಯಾಗಕ್ಕೆ ಹೆಸರಾಗಿದ್ದಾರೆ. ಸಂಕಷ್ಟಗಳಲ್ಲಿಯೇ ಬೆಳೆದಿದ್ದ ಓಬವ್ವ ಸಾಮಾನ್ಯ ಮಹಿಳೆ ಅಷ್ಟೆ, ಆದರೆ ಇತಿಹಾಸದಲ್ಲಿ ಅವರ ಸಾಹಸವನ್ನು ಯಾರೂ ಮರೆಯದಂತೆ ದಾಖಲಿಸಿದ್ದಾರೆ ಎಂದು ಅವರ ಹೋರಾಟವನ್ನು ಸ್ಮರಿಸಿದರು.

ಉದ್ಘಾಟಿಸಿದ ಉಪವಿಬಾಗಾಧಿಕಾರಿ ಚಿದಾನಂದ ಗುರುಸ್ವಾಮಿ, ಒನಕೆ ಓಬವ್ವ ಅವರ ಸಾಹಸಗಳನ್ನು ಕೇಳಿದರೆ ಮಹಿಳೆ, ಪುರುಷರಲ್ಲಿ ಸ್ಪೂರ್ತಿಯ ಚಿಲುಮೆ ಚಿಮ್ಮುತ್ತದೆ. ಓಬವ್ವಳ ಸಾಹಸಮಯ ಜೀವನ ಆದರ್ಶವಾಗಿದೆ ಎಂದರು. ಛಲವಾದಿ ಸಮಾಜದ ಸಾಧಕರು, ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಸನ್ಮಾನಿಸಲಾಯಿತು.   ತಹಶೀಲ್ದಾರ ಗಿರೀಶ್ ಬಾಬು, ಛಲವಾದಿ ಸಮಾಜದ ಮುಖಂಡ ಗುಂಡಗತ್ತಿ ಕೊಟ್ರಪ್ಪ ಮಾತನಾಡಿದರು. ಬಿಸಿಎಂ ವಿಸ್ತರಣಾಧಿಕಾರಿ ಭೀಮಪ್ಪ, ಕೃಷಿ ಸಹಾಯಕ ನಿರ್ದೇಶಕ ವಿ.ಸಿ.ಉಮೇಶ್,  ಡಾ.ಬಿ.ಆರ್.ಅಂಬೇಡ್ಕರ ಸಂಘದ ಅಧ್ಯಕ್ಷ ಕೆ.ಸುಭಾಷ್, ಛಲವಾದಿ ಸಮಾಜದ ಮುಖಂಡು, ಪದಾಧಿಕಾರಿಗಳು ಹಾಗೂ ಕಚೇರಿ ಸಿಬ್ಬಂದಿ ಉಪಸ್ಥಿತರಿದ್ದರು.