ಪುಸ್ತಕ ಪ್ರೀತಿಸಿ, ಉನ್ನತಗುರಿ ತಲುಪಿ : ಚಂದ್ರಶೇಖರ

 ಹರಪನಹಳ್ಳಿ : ಮೊಬೈಲ್ ಗೀಳು ಕೈಬಿಟ್ಟು ಪುಸ್ತಕ ಪ್ರೀತಿಸುವುದನ್ನು ಕಲಿತ ವಿದ್ಯಾರ್ಥಿಯು ಯಾವುದೇ ಕ್ಷೇತ್ರದಲ್ಲಿ ಸಾಧನೆ ಮಾಡಲು ಸಾಧ್ಯ ಎಂದು ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ವೈ.ಎಚ್.ಚಂದ್ರಶೇಖರ ತಿಳಿಸಿದರು.

ನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಕೇಂದ್ರ ಗ್ರಂಥಾಲಯ ವತಿಯಿಂದ ಸೋಮವಾರ ಆಯೋಜಿಸಿದ್ದ ರಾಷ್ಟ್ರೀಯ ಗ್ರಂಥಾಲಯ ಸಪ್ತಾಹ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು. ಗ್ರಂಥಾಲಯದಲ್ಲಿ ಕುಳಿತು ಅಧ್ಯಯನ ಮಾಡುವುದರಿಂದ, ನಿರ್ಧಿಷ್ಟ ಗುರಿ ತಲುಪಲು ಸಾಧ್ಯವಾಗುತ್ತದೆ. ಯೌವ್ವನದ ಸಮಯದಲ್ಲಿ ದುಡುಕಿನ ನಿರ್ಧಾರದಿಂದ ಭವಿಷ್ಯವೇ ಹಾಳಾಗುತ್ತದೆ, ಸದಾ ಜಾಗೃತರಾಗಿ ಓದಿನ ಕಡೆ ಗಮನಹರಿಸಿ. ಮನಸ್ಸು ಚಂಚಲವಾದರೆ ಯಶಸ್ವಿ ಗುರಿ ತಲುಪಲು ಸಾಧ್ಯವಾಗುವುದಿಲ್ಲ ಎಂದರು.

ಡಿವೈಎಸ್ಪಿ ಸಂತೋಷ್ ಚವ್ಹಾಣ್ ಮಾತನಾಡಿ, ಮೊಬೈಲ್ ಎಂಬುದು ವಿದ್ಯಾರ್ಥಿಗಳ ಜೀವನ ಹಾಳು ಮಾಡುತ್ತಿದೆ. ಈಗ ಸರ್ಕಾರ ವಿದ್ಯಾರ್ಥಿಗಳಿಗೆ ಸಾಕಷ್ಟು ಸೌಲಭ್ಯಕೊಟ್ಟಿದೆ. ಅವುಗಳನ್ನು ಸದ್ಬಳಕೆ  ಮಾಡಿಕೊಳ್ಳುವತ್ತ ಗಮನಹರಿಸಬೇಕು ಎಂದು ಸಲಹೆ ನೀಡಿದರು.

ಶಾಖಾ ಗ್ರಾಂಥಾಲಯ ಅಧಿಕಾರಿ ಬೋವಿ ಮಂಜುನಾಥ, ಸರ್ಕಾರಿ ನೌಕರರ ಸಂಘದ ತಾಲೂಕು ಅಧ್ಯಕ್ಷ ಎನ್ ಜಿ ಮನೋಹರ, ಪ್ರಾಚಾರ್ಯ ಸತೀಶ್ ಪಾಟೀಲ್, ಇಸ್ಮಾಯಿಲ್ ಎಲಿಗಾರ್ ಮಾತನಾಡಿದರು. ಪ್ರಾಚಾರ್ಯ ಸತೀಶ್ ಪಾಟೀಲ್, ಗಂಥಾಲುಯ ಮೇಲ್ವಿಚಾರಕರ ಸಂಘದ ಅಧ್ಯಕ್ಷ ಕುರಿ ಮಂಜುನಾಥ, ಸಿದ್ದಪ್ಪ, ಅಡವಿಹಳ್ಳಿ ಬಸವರಾಜ್, ನಾಗರಾಜ್, ಗೋಣೆಪ್ಪ, ರಹಮತ್, ಶಶಿಕುಮಾರ, ಧರ್ಮರಾಜ್ ಹಾಗೂ ಉಪನ್ಯಾಸಕರಿದ್ದರು.