ಶ್ರೀ ಕೃಷ್ಣದೇವರಾಯ ವೇದಿಕೆಯಲ್ಲಿ ಸಂಗೀತ ನಿನಾದ

ವಿಜಯನಗರ(ಹಂಪಿ) : ಹಂಪಿ ಉತ್ಸವದ ಅಂಗವಾಗಿ ಶ್ರೀಕೃಷ್ಣದೇವರಾಯ ವೇದಿಕೆ(ಎದುರು ಬಸವಣ್ಣ)ಯಲ್ಲಿ ಮೊದಲನೇಯ ದಿನವಾದ ಶುಕ್ರವಾರ ಸಾಂಸ್ಕೃತಿಕ ಲೋಕವೇ ಅನಾವರಣಗೊಂಡಿತ್ತು.
ವಿವಿಧ ಸಾಂಸ್ಕೃತಿಕ ಕಲಾತಂಡಗಳಿಂದ ಹೊರಹೊಮ್ಮಿದ ಸಂಗೀತ ನಿನಾದವು ಹಂಪಿಯ ಕಲ್ಲುಗಳಲ್ಲಿ ಝೇಂಕಾರಗೊಂಡಿತು.
ಯಲಬುರ್ಗಾದ ಹನುಮಪ್ಪ ದಾಸರ ತಂಡದವರು ‘ಮೂಕನಾಗಬೇಕು ಜಗದೋಳು ಭಾಗ್ಯ ನೀನಾಗಬೇಕು’ ಸಂಗೀತ ಗಾಯನ ಪ್ರಸ್ತುತ ಪಡಿಸುವ ಮೂಲಕ ಜಾನಪದ ಲೋಕವನ್ನೇ ಸೃಷ್ಟಿಸಿದರು.

ಮಿಂಚು ಸಿಜೆ ಅವರು, ಶಿವ ತಾಂಡವ ಗಾಯನಕ್ಕೆ ರೋಮಾಂಚನಗೊಳ್ಳುವ ಭರತನಾಟ್ಯ ನೃತ್ಯ ಪ್ರದರ್ಶಿಸಿದರು.ಹಾವೇರಿಯ ಗದಗಯ್ಯ ಹಿರೇಮಠ ತಂಡವು ಉಧೋ ಎಲ್ಲಮ್ಮ ತಾಯಿ, ಎಲ್ಲಿ ಕಾಣೆ-ಎಲ್ಲಿ ಕಾಣೆ ಯಲ್ಲಮ್ಮ ನಿನ್ನಂತವಳನ್ನ ಗಾಯನ ಸಾದರಪಡಿಸುವ ಮೂಲಕ ಜೋಗತಿ ನೃತ್ಯ ಪ್ರದರ್ಶನ ನೀಡಿದರು.
ಕಾರ್ಯಕ್ರಮದಲ್ಲಿ ಹಿಂದುಸ್ತಾನಿ ಸಂಗೀತ, ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡೆದವು.
ಸಹಾಯಕ ಆಯುಕ್ತ ಸುರೇಶ್ ಕುಮಾರ್ ಅವರು ಕಾರ್ಯಕ್ರಮದ ಉಸ್ತುವಾರಿ ವಹಿಸಿದ್ದರು.
ಭಾಗವಹಿಸಿದ್ದ ಕಲಾವಿದರೆಲ್ಲರಿಗೂ ನೆನಪಿನ ಕಾಣಿಕೆ ನೀಡಿ ಗೌರವಿಸಲಾಯಿತು.