ಹುಟ್ಟೂರನ್ನು ಮರೆತವರು ಮನುಷ್ಯರೇ ಅಲ್ಲ : ಜಯಪ್ರಕಾಶ್ ಸಾರಥಿ

ಹರಪನಹಳ್ಳಿ (ತಾವರಗೊಂದಿ): “ಶ್ರೀ ಬಸವೇಶ್ವರ ಸ್ವಾಮಿಯ ಆಶೀರ್ವಾದದಿಂದ ಶಾಸಕನಾಗಿ ಆಯ್ಕೆಯಾಗಿ ವಿಧಾನಸೌಧಕ್ಕೆ ಹೋದರೆ, ಖಂಡಿತವಾಗಿಯೂ ನಾನು ಜನಿಸಿದ ಊರಾದ ‘ತಾವರಗೊಂದಿ’ ಹೆಸರಲ್ಲೇ ಪ್ರಮಾಣ ವಚನ ಸ್ವೀಕರಿಸುತ್ತೇನೆ” ಎಂದು ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿ (KPCC) ರಾಜ್ಯ ಸಂಯೋಜಕ ಜಯಪ್ರಕಾಶ್ ಸಾರಥಿ ಭಾವುಕವಾಗಿ ನುಡಿದರು.

ವಿಜಯನಗರ ಜಿಲ್ಲೆಯ ಹರಪನಹಳ್ಳಿ ತಾಲೂಕಿನ ತಾವರಗೊಂಡಿ ಗ್ರಾಮದಲ್ಲಿ ಶ್ರೀ ಬಸವೇಶ್ವರ ಜಾತ್ರಾ ಮಹೋತ್ಸವದ ಪ್ರಯುಕ್ತ ಹಮ್ಮಿಕೊಂಡಿದ್ದ ‘ಹೆಡೆ ಎತ್ತಿದ ಹಾವಿಗೆ ಗರಿಬಿಚ್ಚಿದ ಗರುಡ‘ ಸಾಮಾಜಿಕ ನಾಟಕವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಗ್ರಾಮಸ್ಥರ ಕಾರ್ಯಕ್ಕೆ ಜಯಪ್ರಕಾಶ್ ಸಾರಥಿ ಮೆಚ್ಚುಗೆ

ಇಂದಿನ ಡಿಜಿಟಲ್ ಯುಗದಲ್ಲಿ ಕಲೆಯ ಅಸ್ತಿತ್ವದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಅವರು, “ಮೊಬೈಲ್ ಮತ್ತು ಟಿವಿಗಳ ಹಾವಳಿಯಿಂದ ಜನ ನಾಟಕ ಕಲೆಯನ್ನೇ ಮರೆತುಬಿಟ್ಟಿದ್ದಾರೆ. ಬೆಂಗಳೂರಿನಂತಹ ಮಹಾನಗರಗಳಲ್ಲಿ ಅನೇಕರಿಗೆ ನಾಟಕ ಎಂದರೆ ಏನು ಎಂದೇ ಗೊತ್ತಿಲ್ಲ. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲೂ ತಾವರಗೊಂಡಿ ಗ್ರಾಮಸ್ಥರು ನಾಟಕ ಕಲೆಯನ್ನು ಉಳಿಸಿ, ಬೆಳೆಸುತ್ತಿರುವುದು ನಿಜಕ್ಕೂ ಶ್ಲಾಘನೀಯ. ಅವರೆಲ್ಲರಿಗೂ ನನ್ನ ಧನ್ಯವಾದಗಳು” ಎಂದರು.

“ಹುಟ್ಟೂರು ಮರೆತವನು ಮನುಷ್ಯನೇ ಅಲ್ಲ“

ತಮ್ಮ ಮೂಲದ ಬಗ್ಗೆ ಹೆಮ್ಮೆಯಿಂದ ಮಾತನಾಡಿದ ಜಯಪ್ರಕಾಶ್ ಸಾರಥಿ, “ನನ್ನ ಬಗ್ಗೆ ಕೆಲವರು ‘ಅವರ ಅಪ್ಪ ನಮ್ಮ ಊರಾವನೇ, ಆದರೆ ಅವನು ನಮ್ಮ ಊರವನಲ್ಲ’ ಎಂದು ಮಾತನಾಡುತ್ತಾರೆ. ಆದರೆ, ಜನ್ಮ ನೀಡಿದ ಅಪ್ಪ-ಅಮ್ಮ ಹಾಗೂ ಬೆಳೆಸಿದ ಊರನ್ನು ನಾನು ಎಂದಿಗೂ ಮರೆಯುವುದಿಲ್ಲ. ಇವುಗಳನ್ನು ಮರೆತವನು ಮನುಷ್ಯನೇ ಅಲ್ಲ. ನಾನು ಎಲ್ಲೇ ಇರಲಿ, ಯಾವುದೇ ಉನ್ನತ ಸ್ಥಾನಕ್ಕೇರಲಿ, ನಿಮ್ಮದು ಯಾವ ಊರು ಎಂದು ಯಾರಾದರೂ ಕೇಳಿದರೆ, ಎದೆತಟ್ಟಿ ‘ನನ್ನ ಊರು ತಾವರಗೊಂಡಿ’ ಎಂದೇ ಹೇಳುತ್ತೇನೆ” ಎಂದು ತಮ್ಮ ಊರಿನ ಮೇಲಿನ ಅಭಿಮಾನವನ್ನು ವ್ಯಕ್ತಪಡಿಸಿದರು.

ಸಂಭ್ರಮದ ಶ್ರೀ ಬಸವೇಶ್ವರ ರಥೋತ್ಸವ ಹಾಗೂ ಓಕುಳಿ

ಜಾತ್ರಾ ಮಹೋತ್ಸವದ ಅಂಗವಾಗಿ ಬೆಳಿಗ್ಗೆ ಬಸವೇಶ್ವರ ಸ್ವಾಮಿಗೆ ವಿಶೇಷ ಅಲಂಕಾರ ಮತ್ತು ಅಭಿಷೇಕಗಳನ್ನು ಭಕ್ತಿ-ಭಾವದಿಂದ ನೆರವೇರಿಸಲಾಯಿತು.

• ಬುಧವಾರ: ಬಸವೇಶ್ವರ ಸ್ವಾಮಿಯ ಉತ್ಸವಮೂರ್ತಿಯನ್ನು ಪ್ರತಿಷ್ಠಾಪಿಸಿ, ಅದ್ದೂರಿ ರಥೋತ್ಸವ ಜರುಗಿತು.
• ಗುರುವಾರ: ಸಂಜೆ ವಿಜೃಂಭಣೆಯ ಓಕುಳಿ ಉತ್ಸವ ನಡೆಯಿತು. ರಾತ್ರಿ ವರುಣನ (ಮಳೆ) ಆಗಮನದಿಂದ ಮೆರವಣಿಗೆಗೆ ಕೊಂಚ ಅಡಚಣೆಯಾದರೂ, ಸ್ವಲ್ಪ ಹೊತ್ತಿನ ಬಳಿಕ ಉತ್ಸವ ಮೂರ್ತಿಯು ತುಂಗಭದ್ರಾ ನದಿಗೆ ತೆರಳಿ ಮಂಗಲ ಸ್ನಾನ ನೆರವೇರಿಸಿತು. ತದನಂತರ ಸಕಲ ವಾದ್ಯಗೋಷ್ಠಿಗಳೊಂದಿಗೆ ಭವ್ಯ ಮೆರವಣಿಗೆಯ ಮೂಲಕ ಸಿಂಹಾಸನ ಕಟ್ಟೆಗೆ ಮೂರ್ತಿಯನ್ನು ತರಲಾಯಿತು.

ಗಣ್ಯರು ಹಾಗೂ ಕಲಾವಿದರ ಉಪಸ್ಥಿತಿ

ಈ ಸಂದರ್ಭದಲ್ಲಿ ಗ್ರಾಮದ ಮುಖಂಡರಾದ ಬಣಕಾರ ಕರಿಬಸಪ್ಪ, ಮಲ್ಲಪ್ಪ ಬಸವರಾಜ್, ಪಿ.ಸೋಮಲಿಂಗಪ್ಪ, ಬೆನ್ನೂರು ಗುರುರಾಜ್, ಎಚ್.ಶಿವಪ್ಪ, ಎಚ್.ವಿರೂಪಾಕ್ಷಿ, ಜಿ.ಮಲ್ಲಿಕಾರ್ಜುನ್, ಎಸ್.ರವೀಂದ್ರ, ಜಿ.ಕರಿಬಸಪ್ಪ, ಬಣಕಾರ್ ಶಿವಪ್ರಸಾದ್ ಹಾಗೂ ಬಸವೇಶ್ವರ ಸೇವಾ ಸಮಿತಿಯ ಸರ್ವ ಪದಾಧಿಕಾರಿಗಳು ಉಪಸ್ಥಿತರಿದ್ದರು.

ನಾಟಕದ ಪಾತ್ರಧಾರಿಗಳು: ‘ಹೆಡೆ ಎತ್ತಿದ ಹಾವಿಗೆ ಗರಿ ಬಿಚ್ಚಿದ ಗರುಡ’ ನಾಟಕದಲ್ಲಿ ಅದ್ಭುತ ಅಭಿನಯ ನೀಡಿದ ವೈ.ದೇವೇಂದ್ರಪ್ಪ, ಎಂ.ಬಸವರಾಜ್, ಎಚ್.ಹರೀಶ್, ಎಚ್.ಗಣೇಶ್, ಕೆ.ನಿಂಗಪ್ಪ, ವೈ.ಸಿದ್ದಪ್ಪ, ಎನ್.ಬಸವರಾಜ್, ಎಂ.ಕರಿಬಸಪ್ಪ, ದಾವಣಗೆರೆ ಭವಾನಿ, ರಮ್ಯಾ, ಗೀತಾ ಹಾಗೂ ಕೆ.ಚಂದನ್ ಪಾಲ್ಗೊಂಡಿದ್ದರು.