ಹರಪನಹಳ್ಳಿಯಲ್ಲಿ ಬೀದಿ ದೀಪ ನಿರ್ಲಕ್ಷ್ಯ | ಅಕ್ರಮ ನಳ ಬಂದ್ ಗೆ ಒತ್ತಾಯ | 43 ಮಳಿಗೆ ಹರಾಜು ಶೀಘ್ರ!

ಹರಪನಹಳ್ಳಿ : ಇಲ್ಲಿಯ ಪುರಸಭೆ ಸಭಾಂಗಣದಲ್ಲಿ ಗುರುವಾರ ಜರುಗಿದ ಸಾಮಾನ್ಯ ಸಭೆಯಲ್ಲಿ ಹಲವು ವಿಷಯಗಳನ್ನು ಚರ್ಚಿಸಲಾಯಿತು.

ಅಧ್ಯಕ್ಷೆ ಫಾತೀಮಾಬಿ ಅಧ್ಯಕ್ಷತೆಯಲ್ಲಿ ಜರುಗಿದ ಸಭೆಯಲ್ಲಿ ಸದಸ್ಯ ಲಾಟಿ ದಾದಾಪೀರ ಮಾತನಾಡಿ, ಬೀದಿ ದೀಪ ನಿರ್ವಹಣೆ ಸರಿಯಾಗಿ ನಿರ್ವಹಿಸುತ್ತಿಲ್ಲ ಎಂದು ದೂರಿದರು. ಇದಕ್ಕೆ ದನಿಗೂಡಿಸಿದ ಸದಸ್ಯ ಎಂ.ವಿ.ಅಂಜಿನಪ್ಪ ಅರಸೀಕೆರೆ ರಸ್ತೆಯಲ್ಲಿ ಬೀದಿ ದೀಪವಿಲ್ಲದೇ ತೊಂದರೆಯಾಗಿದೆ ಎಂದರು.

ಶಾಸಕರ‌ ಅನುದಾನದಡಿ 3500 ದೀಪ ಖರೀದಿಸಿ ಕೊಡುವುದಾಗಿ ತಿಳಿಸಿದ್ದಾರೆ, ಹೈಮಾಸ್ಟ್ ದೀಪದ‌ ವ್ಯವಸ್ಥೆ ಸಹ ಕಲ್ಪಿಸಲು ಸಿದ್ಧರಿದ್ದಾರೆ. ಹಾಗಾಗಿ ಬೀದಿ ದೀಪ ನಿರ್ವಹಣೆ ಮಾಡುವ ಗುತ್ತಿಗೆದಾರರು, ಸಾರ್ವಜನಿಕ ಸ‍್ಥಳದಲ್ಲಿ ಬೆಳಕಿನ ವ್ಯವಸ್ಥೆ ಮಾಡಲು ನಿರ್ಲಕ್ಷ್ಯ ಮಾಡಬಾರದು ಎಂದು ಹೇಳಿದರು. ಸದಸ್ಯ ಅಬ್ದುಲ್ ರೆಹಮಾನ್, ಅಗತ್ಯವಿರುವ ಕಡೆ ಹೈಕಮಾಸ್ಟ್ ತುರ್ತಾಗಿ ದುರಸ್ಥಿಪಡಿಸಿ ಎಂದು ಸಲಹೆ ನೀಡಿದರು.

ಸದಸ್ಯ ಎಂ.ವಿ.ಅಂಜಿನಪ್ಪ ಮಾತನಾಡಿ, ಪುರಸಭೆ ವಾಹನಗಳು ಸಾಕಷ್ಟು ಡ್ಯಾಮೆಜ್ ಆಗುತ್ತವೆ, ಅವುಗಳಿಗೆ ವಿಮಾ ಸೌಲಭ್ಯ ಪಡೆದು ಏಕೆ ದುರಸ್ಥಿ ಪಡಿಸುತ್ತಿಲ್ಲ ಎಂದು ಪ್ರಶ್ನಿಸಿದರು. ಸದಸ್ಯ ದಾದಾಪೀರ, ಕುಡಿಯುವ ನೀರಿನ ಸಮಸ್ಯೆ ಇದೆ, ಪೂರೈಕೆಯಲ್ಲಿ ಅವ್ಯವಸ್ಥೆಯಾಗಿದೆ ಎಂದು ತಿಳಿಸಿದರು.
ಅಕ್ರಮ ನಳ ಸಂಪರ್ಕ ಕೊಡುತ್ತಿದ್ದಾರೆ, ಶೀಘ್ರ ಅಕ್ರಮ ನಳ ಬಂದ್ ಮಾಡಿ ಇಲ್ಲವೇ ಸಕ್ರಮಗೊಳಿಸಿ ಎಂದು ಸದಸ್ಯರಾದ ಇಜಂತಕರ ಮಂಜುನಾಥ್, ಉದ್ದಾರ ಗಣೇಶ, ಜಾವಿದ್ ಒತ್ತಾಯಿಸಿದರು.
ಸದಸ್ಯ ಹರಾಳು ಅಶೋಕ, 43 ಮಳಿಗೆ ಹರಾಜು ಮಾಡುವ ತೀರ್ಮಾನ ಮಾಡಿತ್ತು, ವಿಳಂಬವಾಗಿದ್ದು ಏಕೆ ಎಂದರು. ಶೀಘ್ರ ಕ್ರಮ ಕೈಗೊಳ್ಳುವುದಾಗಿ ಮುಖ್ಯಾಧಿಕಾರಿ ರೇಣುಕಾದೇಸಾಯಿ ಸಭೆ ಗಮನಕ್ಕೆ ತಂದರು.

ಸರ್ವೆ ನಂಬರ್ 163/7, ಸರ್ವೆ ನಂಬರ್ 63ರಲ್ಲಿ ತಾತ್ಕಾಲಿಕ ವಸತಿ ವಿನ್ಯಾಸಕ್ಕೆ ಅಂತಿಮ ಅನುಮೋದನೆ ಮತ್ತು ಮನೆ ನಂಬರ್ ವಿತರಣೆಗೆ ಸಭೆ ಅನುಮತಿಸಿತು. ಸಹಾಯಕ ಆಯುಕ್ತರ ವಸತಿ ನಿಲಯದ ಬಳಿ ಶಿಥಿಲಗೊಂಡಿರುವ ಮೇಲ್ಮಟ್ಟದ ಜಲ ಸಂಗ್ರಾಹಗಾರ ನೆಲಸಮ ಗೊಳಿಸಲು ನಿರ್ಧರಿಸಿದರು. ಸದಸ್ಯ ಹರಾಳು ಅಶೋಕ ಮಾತನಾಡಿ, ನಗರದಲ್ಲಿ ಹಾದು ಹೋಗಿರುವ ಹೊಸಪೇಟೆ, ಶಿವಮೊಗ್ಗ ರಾಜ್ಯ ಹೆದ್ದಾರಿ ಡಿವೈಡರ್ ಕಾಮಗಾರಿ ಶೀಘ್ರ ಪೂರ್ಣಗೊಳಿಸಲು ಒತ್ತಾಯಿಸಿದರು. ಅಧ್ಯಕ್ಷೆ ಫಾತೀಮಾಬಿ ಮಾತನಾಡಿ, ಎ ಖಾತಾ ವರ್ಗಾವಣೆ ವಿಳಂಬವಾಗುತ್ತಿದ್ದು, ಶೀಘ್ರ ವಿಲೇವಾರಿಗೆ ಸೂಚಿಸಿದರು.

ಪುರಸಭೆ ಮೊದಲ ಕೌನ್ಸಿಲ್ ಸಭೆಯ ಪೊಟೊವನ್ನು ಸದಸ್ಯ ಇಜಂತಕರ್ ಮಂಜುನಾಥ ಕೊಡುಗೆ ನೀಡಿದರು. ಉಪಾಧ್ಯಕ್ಷ ಎಚ್.ಕೊಟ್ರೇಶ್, ಸ್ಥಾಯಿ ಸಮಿತಿ ಅಧ್ಯಕ್ಷ ಟಿ.ವೆಂಕಟೇಶ್, ಮುಖ್ಯಾಧಿಕಾರಿ ರೇಣುಕಾ ಎಸ್.ದೇಸಾಯಿ, ಎಂಜಿನಿಯರ್ ಸಿದ್ದಲಿಂಗಸ್ವಾಮಿ, ಅಮರೇಶ್,ಹಿರಿಯ ಆರೋಗ್ಯ ನಿರೀಕ್ಷಕ ಮಂಜುನಾಥ ಇತರರಿದ್ದರು