ಹರಪನಹಳ್ಳಿ : ಮಾಜಿ ಉಪಮುಖ್ಯಮಂತ್ರಿ ದಿ.ಎಂ.ಪಿ.ಪ್ರಕಾಶ್ ಅವರಂತೆ ರಂಗಭೂಮಿ, ಸಾಂಸ್ಕೃತಿಕ ಲೋಕದ ಕಲಾವಿದರನ್ನು ಪ್ರೋತ್ಸಾಹಿಸುವ ಕಾಳಜಿಯೊಂದಿಗೆ ತಂದೆಯ ದಾರಿಯಲ್ಲಿ ಸಾಗುತ್ತಿರುವ ಶಾಸಕರಾದ ಎಂ.ಪಿ.ಲತಾ ಮಲ್ಲಿಕಾರ್ಜುನ್ ಅವರೀಗ ಹರಪನಹಳ್ಳಿ ಹಳೇ ಬಸ್ ನಿಲ್ದಾಣ ವೀರಭದ್ರೇಶ್ವರ ದೇವಸ್ಥಾನ ಆವರಣದಲ್ಲಿ ಎಂ.ಪಿ.ರವೀಂದ್ರ ಪ್ರತಿಷ್ಠಾನದಿಂದ ಕಾರ್ತಿಕ ಮಾಸದ ನಾಟಕೋತ್ಸವ ನ.22 ರಿಂದ ನ.24ರ ವರೆಗೆ ಮೂರು ದಿನ ಆಯೋಜಿಸಿದ್ದಾರೆ.
ಈ ಕುರಿತು ಎಂ.ಪಿ.ರವೀಂದ್ರ ಪ್ರತಿಷ್ಠಾನದ ಅಧ್ಯಕ್ಷ ಎಚ್.ಎಂ.ಗೌತಮ್ ಪ್ರಭು ಮಾತನಾಡಿ, ಸಾಣೆಹಳ್ಳಿ ಶಿವಸಂಚಾರ ರಂಗ ಕಲಾವಿದರಿಂದ ನಡೆಯುವ ನ.22ರ ಶನಿವಾರ ಸಂಜೆ 7 ಗಂಟೆಗೆ ಜಂಗಮದೆಡೆಗೆ, ನ.23ರ ಭಾನುವಾರ ಸಂಜೆ 7 ಗಂಟೆಗೆ ಕಳ್ಳರ ಸಂತೆ, ನ.24ರ ಸೋಮವಾರ ಸಂಜೆ 7 ಗಂಟೆಗೆ ಶಿವಯೋಗಿ ಸಿದ್ದರಾಮೇಶ್ವರ ನಾಟಕಗಳು ಎಂ.ಪಿ.ರವೀಂದ್ರ ರಂಗವೇದಿಕೆಯಲ್ಲಿ ಪ್ರದರ್ಶನಗೊಳ್ಳಲಿವೆ.
ಸಾಣೆಹಳ್ಳಿ ಶಿವ ಸಂಚಾರ ರಂಗ ಕಲಾವಿದರ ಭಾವಾಭಿನಯ, ವಸ್ತ್ರ ವಿನ್ಯಾಸ, ಆಕರ್ಷಕ ರಂಗ ವೇದಿಕೆ, ಸುಂದರ ಪದ ಪ್ರಯೋಗ.. ಮನೋರಂಜನೆಯ ಜೊತೆಗೆ, ಸಾಮಾಜಿಕ ಸಂಬಂಧಗಳನ್ನು ಸೃಜನಶೀಲ ನೆಲಗಟ್ಟಿನ ಮೇಲೆ ಬೆಸೆಯುವಂತಹ, ಜಾತ್ಯಾತೀತತೆ, ಮನುಷ್ಯ ಪ್ರೀತಿ ಇಟ್ಟುಕೊಂಡ ನಾಟಕಗಳು ಇವಾಗಿವೆ. ತಾಲ್ಲೂಕಿನ ಜನತೆ ಸಮಯಕ್ಕೆ ಸರಿಯಾಗಿ ಆಗಮಿಸಿ ಕಾರ್ಯಕ್ರಮ ಯಶಸ್ವಿಗೊಳಿಸಲು ಪ್ರತಿಷ್ಠಾನದ ಅಧ್ಯಕ್ಷ ಎಚ್.ಎಂ.ಗೌತಮ್ ಪ್ರಭು ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
