ಪಾಕ್ ಜೈಲಲ್ಲಿ ಹತ್ಯೆ ಆದರಾ ಇಮ್ರಾನ್ ಖಾನ್ ; ಹತ್ಯೆಯ ಹಿಂದಿದೆಯಾ ಅಮೆರಿಕ ?: ಇಂಥದ್ದೊಂದು ಸುದ್ದಿ ಕೇಳಿ ಇಡೀ ದಕ್ಷಿಣ ಏಷಿಯಾದ ರಾಷ್ಟ್ರಗಳ ರಾಜಕೀಯ ಪಡಸಾಲೆ ಕಂಪಿಸುತ್ತಿದೆ. ಕಳೆದೊಂದು ತಿಂಗಳ ಅಂತರದಲ್ಲಿ ಪಾಕಿಸ್ತಾನದ ರಾವಲ್ಪಿಂಡಿಯ ಅಡಿಯಾಲ ಜೈಲಿನಲ್ಲಿ ಘಟಿಸುತ್ತಿರುವ ಬೆಳವಣಿಗೆಗಳು ಇಂತಹ ಕಂಪನಗಳಿಗೆ ಭೂಮಿಕೆ ಒದಗಿಸುತ್ತಿವೆ.
ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸೀಮ್ ಮುನೀರ್ ಪದೇ ಪದೇ ಅಮೇರಿಕ ಸುತ್ತುತ್ತಿರುವುದರ ಹಿಂದೆ ನಿಘೂಡ ಕಾರ್ಯಸೂಚಿ ಏನಾದರೂ ಅಡಗಿದೆಯಾ? ಗೊತ್ತಿಲ್ಲ!
ಆದರೆ ಪಾಕ್ ಮಾಜಿ ಪ್ರಧಾನಿ ಇಮ್ರಾನ್ ಖಾನ್, ಅಡಿಯಾಲ ಜೈಲಲ್ಲಿಯೇ ಹತ್ಯೆಯಾಗಿದ್ದಾರೆ ಎಂಬ ವರ್ತಮಾನ ಇಡೀ ಪಾಕಿಸ್ತಾನವನ್ನು ಇನ್ನಷ್ಟು ಪ್ರಕ್ಷುಬ್ದಗೊಳಿಸಿಬಿಟ್ಟಿದೆ!
ಆಫ್ಘಾನಿಸ್ತಾನದ ಮೂಲಗಳು ಇಮ್ರಾನ್ ಖಾನ್ ಅವರನ್ನು ಐ.ಎಸ್.ಐ ಕೊಂದಿದೆ ಎಂದು ಹೇಳುತ್ತಿದ್ದರೇ, ಬಲೂಚಿಸ್ಥಾನ ನೇರವಾಗಿ ಅಮೇರಿಕದತ್ತ ಬೆರಳು ತೋರುತ್ತಿದೆ!
ಇಷ್ಟಾದರೂ ಇಮ್ರಾನ್ ಖಾನ್ ಬದುಕಿದ್ದರ ಬಗ್ಗೆ ಪಾಕಿಸ್ತಾನ ತುಟಿ ಬಿಚ್ಚುತ್ತಿಲ್ಲ!
ಪಾಕಿಸ್ತಾನ: ಅನಿಶ್ಚಿತತೆಯ ಅತಂತ್ರ ದೇಶ
ಪಾಕಿಸ್ತಾನ ಎಂಬುದು ಅಕ್ಷರಶಃ ಅನಿಶ್ಚಿತತೆಯ ಅತಂತ್ರ ದೇಶ!
ಉಗ್ರವಾದದ ಪೋಷಣೆ ಮತ್ತದರ ಉತ್ತೇಜನೆಯು ಪಾಕಿಸ್ತಾನವನ್ನು ಇನ್ನಿಲ್ಲದಷ್ಟು ದಯನೀಯ ಸ್ಥಿತಿಗೆ ದೂಡಿದೆ!
ರಾಜಕೀಯ ಹತ್ಯೆಗಳು, ಸೇನಾ ದಾಳಿಗಳು ಪಾಕಿಸ್ತಾನದ ಮಟ್ಟಿಗೆ ಸರ್ವೆ ಸಾಮಾನ್ಯ ಎಂಬಂತಾಗಿ ದಶಕಗಳೇ ಉರುಳಿವೆ!
ಮದ್ದು ಗುಂಡುಗಳ ವ್ಯಾಪಾರ ಆ ಮೂಲಕ ಅಂತರಾಷ್ಟ್ರೀಯ ಮಾರುಕಟ್ಟೆಯ ಪಾರುಪತ್ಯ ತನ್ನದಾಗಿಸಿಕೊಂಡಿರುವ ಪಾಕಿಸ್ತಾನ ಈಗ ಅದರಿಂದಲೇ ಅಂತ್ಯಗೊಳ್ಳುವ ಆತಂಕ ಕೂಡ ಎದುರಿಸುತ್ತಿದೆ!
ಹೀಗಾಗಿಯೇ ಇಲ್ಲಿ ಶಾಲೆಗೆ ಹೋದ ಮಗು, ಪ್ರಧಾನಿ ಹುದ್ದೆಗೆ ಕೂತ ವ್ಯಕ್ತಿ ಅಷ್ಟು ಸಲೀಸಾಗಿ ಮನೆಗೆ ಮರಳದೇ ಬೀದಿಯಲ್ಲಿ ಹತರಾಗುತ್ತಿದ್ದಾರೆ!
ಸರಿಸುಮಾರು ಇಪ್ಪತ್ತೆರಡು ಪ್ರಧಾನಿಗಳನ್ನು ಕಂಡಿರುವ ಪಾಕಿಸ್ತಾನ, ಐದು ವರ್ಷಗಳ ಪೂರ್ಣಾವಧಿ ನಾಯಕತ್ವವನ್ನು ಇದುವರೆಗೂ ಕಂಡೇ ಇಲ್ಲ!
ಸೇನೆ ಮತ್ತು ರಾಜಕೀಯ ನಾಯಕತ್ವದ ನಡುವೆ ಹಿಂದಿನಿಂದಲೂ ಇರುವ ಸಂಘರ್ಷ, ಪಾಕಿಸ್ತಾನವನ್ನು ಪರಿಪೂರ್ಣ ನಾಗರೀಕ ರಾಷ್ಟ್ರವನ್ನಾಗಿ ರೂಪಿಸಲು ಬಿಡುತ್ತಿಲ್ಲ!
ಇದಕ್ಕೆ ಪ್ರಯತ್ನ ಪಟ್ಟವರೆಲ್ಲ ಒಂದೋ ಹತಾರಾಗಿ ಹೋಗಿದ್ದರೆ, ಇಲ್ಲವೇ ಸಾಯುವತನಕ ಜೈಲಲ್ಲಿ ಕೊಳೆಯುವಂತೆ ಶಿಕ್ಷಿಸಲ್ಪಡುತ್ತಾರೆ!
ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಕಥೆ ಇದಕ್ಕೆ ಹೊರತಾಗಿಲ್ಲ!
Read This: ಡಿಸಿಎಂ ಡಿಕೆ ಶಿವಕುಮಾರ ಲವಲವಿಕೆ
ಜೈಲಿನಲ್ಲಿ 22 ದಿನಗಳ ರಹಸ್ಯ
ಕಳೆದ ಇಪ್ಪತ್ತೆರಡು ದಿನಗಳ ಅಂತರದಲ್ಲಿ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಬಂಧನದಲ್ಲಿರುವ ರಾವಲ್ಪಿಂಡಿಯ ಅಡಿಯಾಲ ಜೈಲು ಬಹಳಷ್ಟು ಬೆಳವಣಿಗೆಗಳನ್ನು ಕಾಣುತ್ತಿದೆ!
ಇಮ್ರಾನ್ ಖಾನ್ ಕಾಣ ಬಯಸುವ ಯಾರೊಬ್ಬರಿಗೂ ಭೆಟಿಯ ಅವಕಾಶ ನಿರಾಕರಿಸಲಾಗುತ್ತಿದೆ.
ಜೈಲು ಹೊರಗಿನ ಕಾವಲು ಸೇನಾ ತುಕಡಿಗಳ ಸಂಖ್ಯೆ ಮತ್ತಷ್ಟು ಹೆಚ್ಚು ಮಾಡಲಾಗಿದೆ.
ಗೆಳೆಯನನ್ನು ಕಾಣಲು ಬಂದಿದ್ದ ಶಾಹಿದ್ ಆಫ್ರೀದಿಗೂ ಬಂಧಿಸುವ ಎಚ್ಚರಿಕೆ ನೀಡಲಾಗಿದೆ.
ಇಮ್ರಾನ್ ಭೇಟಿಗೆ ಜಿದ್ದು ಮಾಡಿ ಧರಣಿ ಕೂತಿದ್ದ ಅಕ್ಕ ತಂಗಿಯರನ್ನು ಪಾಕಿಸ್ತಾನದ ಪೊಲೀಸರು ದಾರಿಯಲ್ಲಿ ದರದರನೇ ಎಳೆದು ಹೊಡೆದಿದ್ದಾರೆ.
ಇಮ್ರಾನ್ ಖಾನ್ ಸ್ಥಾಪಿತ ಪಾಕಿಸ್ತಾನ ತಹರೀಫ್ ಇನ್ಸಾಫ್ ಪಕ್ಷದ ಸುಮಾರು ಇಪ್ಪತ್ತು ಸಾವಿರ ಕಾರ್ಯಕರ್ತರ ಮೇಲೆ ಪಾಕಿಸ್ತಾನ ಸರ್ಕಾರ ಈಗಾಗಲೇ ಕೇಸುಗಳನ್ನು ಜಡಿದು ಅವರ ಧ್ವನಿ ಹತ್ತಿಕ್ಕಿದೆ.
ಇವೆಲ್ಲವೂ ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸೀಮ್ ಮುನೀರ್ ಇಶಾರೆ ಮೇರೆಗೆಯೇ ಜರುಗುತ್ತಿವೆ!
ಇಷ್ಟರ ನಡುವೆಯೇ ತೀವ್ರ ಚಿತ್ರಹಿಂಸೆ ಅನುಭವಿಸಿ ಜೈಲಲ್ಲಿಯೇ ಅಸುನೀಗಿರುವ ಇಮ್ರಾನ್ ಖಾನ್ ಚಿತ್ರ, ಇಡೀ ಪಾಕಿಸ್ತಾನದ ಉದ್ದಗಲಕ್ಕೂ ಹರಡಿ ಬೂದಿ ಮುಚ್ಚಿದ ಕೆಂಡದಂತೆ ಹೊಗೆಯಾಡುತ್ತಿದೆ!
ಇಮ್ರಾನ್ ಖಾನ್ ಸತ್ತು ಹೋದನಾ? ಬದುಕಿ ಉಳಿದಿದ್ದಾನಾ?
ಎಂಬೆರಡು ಪ್ರಶ್ನೆಗಳಿಗೆ ಪಾಕ್ ಪ್ರಧಾನಿ ಶಹಬಾಜ್ ಶರೀಫ್ ಬಳಿಯೇ ಉತ್ತರಗಳಿಲ್ಲ!
ಅಷ್ಟರ ಮಟ್ಟಿಗೆ ಇಮ್ರಾನ್ ಖಾನ್ ಅಳಿವು ಉಳುವಿನ ವರ್ತಮಾನಗಳು ನಿಘೂಡವಾಗಿಬಿಟ್ಟಿವೆ!
ಕ್ರಿಕೆಟ್‌ನಿಂದ ರಾಜಕೀಯದವರೆಗೆ ಇಮ್ರಾನ್ ಪಯಣ
ಪಾಕಿಸ್ತಾನದ ರಾಜಕೀಯ ಮತ್ತು ಸಾಮಾಜಿಕ ಸ್ಥಿತ್ಯಂತರಗಳ ಮಟ್ಟಿಗೆ ಇಮ್ರಾನ್ ಖಾನ್ ಹೆಸರು ಅತಿದೊಡ್ಡ ಬದಲಾವಣೆಗಳಿಗೆ ಕಾರಣವಾಗಿದ್ದು ಸುಳ್ಳೆನಲ್ಲ.
ಲಾಹೋರಿನ ಜಮಾನ್ ಪಾರ್ಕ್‌ ಪ್ರದೇಶದ ಪಶ್ತೂನ್ ಕುಟುಂಬದ ಕುಡಿಯಾಗಿರುವ ಇಮ್ರಾನ್ ಖಾನ್, ಜಾಗತೀಕ ಕ್ರಿಕೇಟ್ ಲೋಕದ ದೃವತಾರೆಯಾಗಿ ಮಿಂಚಿದ್ದನ್ನು ಇತಿಹಾಸ ಇನ್ನೂ ಮರೆತಿಲ್ಲ.
ಸೋದರ ಸಂಬಂಧಿಗಳಾದ ಮಜೀದ್ ಖಾನ್ ಮತ್ತು ಜಾವೇದ್ ಬುರ್ಕಿಯಿಂದ ಪ್ರೆರಿತರಾಗಿ ಕ್ರಿಕೇಟ್ ಜಗತ್ತಿಗೆ ಕಾಲಿಡುವ ಇಮ್ರಾನ್ ಖಾನ್, ಇಸವಿ 1971 ರಲ್ಲಿ ಪಾಕಿಸ್ತಾನ ಪರ ತಮ್ಮ ಮೊದಲ ಪಂದ್ಯದಲ್ಲಿ ಬೌಂಡರಿ ಬೀಸಿದಾತ.
ಎಂಭತ್ತರ ದಶಕ ಆರಂಭ ಆಗುವಷ್ಟರಲ್ಲಿ ಇಮ್ರಾನ್ ಖಾನ್ ಇಡೀ ಜಗತ್ತಿನ ಗಮನ ಸೆಳೆದಿದ್ದ.
ಇಸವಿ 1982 ರ ಹೊತ್ತಿಗೆಲ್ಲಾ ಪಾಕಿಸ್ತಾನ ಕ್ರಿಕೇಟ್ ತಂಡದ ನಾಯಕನಾಗಿ ಹೊರಹೊಮ್ಮಿದ ಇಮ್ರಾನ್ ಖಾನ್, ಪಾಕಿಸ್ತಾನ ಪರ ಸುಮಾರು 263 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ ಆಲ್ ರೌಂಡರ್ ಪ್ಲೇಯರ್ ಕೂಡ ಹೌದು!
ಕ್ರಿಕೇಟ್ ವೃತ್ತಿ ಬದುಕಿನಲ್ಲಿ ಸುಮಾರು 7516 ರನ್ ಗಳಿಸಿ, 544 ವಿಕೆಟುಗಳನ್ನು ಪಡೆದಿರುವ ಇಮ್ರಾನ್ ಖಾನ್, ಒಟ್ಟು 89 ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ ಪಾಕಿಸ್ತಾನದ ನಾಯಕತ್ವವನ್ನು ವಹಿಸಿಕೊಂಡಿದ್ದ.
ಇಸವಿ 1992 ರಲ್ಲಿ ಸಿಕ್ಕ ಅವಕಾಶವನ್ನು ಸದುಪಯೋಗ ಮಾಡಿಕೊಂಡ ಇಮ್ರಾನ್ ಖಾನ್, ವಿಶ್ವ ಕಪ್ ಚಾಂಪಿಯನ್ ಗೆದ್ದು ಪಾಕಿಸ್ತಾನಕ್ಕೆ ಮೆರಗು ತಂದುಕೊಟ್ಟ.
ಪಾಕಿಸ್ತಾನ ವಿಶ್ವ ಚಾಂಪಿಯನ್ ಆಗಿದ್ದು ಅದೇ ಮೊದಲು ಎಂಬುದನ್ನು ಇಲ್ಲಿ ಒತ್ತಿ ಹೇಳಬೇಕಿಲ್ಲ!
ಇಂಥದ್ದೊಂದು ದೊಡ್ಡ ಯಶಸ್ಸಿನ ನಂತರ, ಇಮ್ರಾನ್ ಖಾನ್ ಕ್ರಿಕೆಟ್‌ ಜಗತ್ತಿಗೆ ವಿದಾಯ ಹೇಳಿದರು.
ಇಸವಿ 1992 ರಲ್ಲಿ ಕ್ರಿಕೆಟ್‌ಗೆ ವಿದಾಯ ಹೇಳಿದ ಇಮ್ರಾನ್ ಖಾನ್, ಇಸವಿ 1996 ರಲ್ಲಿ ತೆಹ್ರೀಕ್-ಇ-ಇನ್ಸಾಫ್ ಪಕ್ಷವನ್ನು ಸ್ಥಾಪಿಸಿ ರಾಜಕಾರಣಕ್ಕೆ ಧುಮುಕಿದ.
ಅಲ್ಲಿಂದ ಅವರ ರಾಜಕಾರಣಿಯಾಗುವ ಪ್ರಯಾಣ ಪ್ರಾರಂಭವಾಯಿತು ಎಂದು ಪಾಕಿಸ್ತಾನದ ಚರಿತ್ರೆ ಸಾಕ್ಷ್ಯ ನುಡಿಯುತ್ತಿದೆ!
ರಾಜಕೀಯ ಏಳು-ಬೀಳು
ಇಸವಿ 2002 ರಲ್ಲಿ ಮೊದಲ ಬಾರಿಗೆ ಸಂಸದರಾದ ಇಮ್ರಾನ್ ಖಾನ್, ಅಂದಿನ ಪ್ರಧಾನಿ ಜನರಲ್ ಪರ್ವೇಜ್ ಮುಷರಫ್ ಅವರನ್ನು ಟೀಕಿಸಿದ್ದಕ್ಕಾಗಿ ಮೊದಲ ಬಾರಿಗೆ ಜೈಲು ಕಾಣುತ್ತಾರೆ!
ಇಸವಿ 2013 ರಲ್ಲಿ ಪುನಃ ಸಂಸದನಾಗಿ ಆಯ್ಕೆಯಾಗುವ ಇಮ್ರಾನ್ ಖಾನ್, ತನ್ನ ತೆಹ್ರೀಕ್-ಇ-ಇನ್ಸಾಫ್ ಪಕ್ಷವನ್ನು ಪಾಕಿಸ್ತಾನದ ಎರಡನೇ ಅತಿದೊಡ್ಡ ರಾಜಕೀಯ ಪಕ್ಷವಾಗಿ ಹೊರಹೊಮ್ಮಲು ಕಾರಣನಾಗುತ್ತಾನೆ.
ಇಸವಿ 2018ರಲ್ಲಿ ಘೋಷಣೆಯಾಗುವ ಪಾಕಿಸ್ತಾನದ ಸಾರ್ವತ್ರಿಕ ಚುನಾವಣೆಯಲ್ಲಿ ಇಮ್ರಾನ್ ಖಾನ್ ಸ್ಥಾಪಿತ ಪಕ್ಷವು 5 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿತು.
ಆಗಲೇ ಸುಮಾರು 116 ಸ್ಥಾನಗಳನ್ನು ಗೆದ್ದು ತೆಹ್ರೀಕ್-ಇ-ಇನ್ಸಾಫ್ ಪಕ್ಷವು ಪಾಕಿಸ್ತಾನದಲ್ಲಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮುತ್ತದೆ.
ಬಳಿಕ ಪಾಕಿಸ್ತಾನ ಪ್ರಧಾನಿ ಹುದ್ದೆಗೆ ನಾಮನಿರ್ದೇಶನಗೊಳ್ಳುವ ಇಮ್ರಾನ್ ಖಾನ್, ಮೊದಲ ಬಾರಿಗೆ ಪಾಕಿಸ್ತಾನದ ಪ್ರಧಾನಿಯಾಗಿ ಅಧಿಕಾರ ಸ್ವೀಕರಿಸುತ್ತಾನೆ!
ಪ್ರಧಾನಿಯಾದ ಬಳಿಕ ಅಧಿಕಾರ ವಿಕೇಂದ್ರಿಕರಣದತ್ತ ಒಲವು ತೋರಿದ ಇಮ್ರಾನ್ ಖಾನ್ ಮೇಲೆ ಆಗಿನ ಸೇನಾ ಮುಖ್ಯಸ್ಥ ಜನರಲ್ ಕಮರ್ ಜಾವೇದ್ ಬಜ್ವಾ ಕಂಗೆಣ್ಣು ಬೀರುತ್ತಾನೆ!
ಇಬ್ಬರ ನಡುವಿನ ಅಂತರ್ಯುದ್ಧದಲ್ಲಿ ಸೇನೆಯ ಬೆಂಬಲ ಹೊಂದಿದ್ದ ಜಾವೇದ್ ಬಜ್ವಾ ಗೆದ್ದು ಬೀಗಿದರೆ, ಇಮ್ರಾನ್ ಖಾನ್ ಪ್ರಧಾನಿ ಪಟ್ಟದಿಂದ ಪದಚ್ಯುತಗೊಂಡು ಜೈಲು ಸೇರುತ್ತಾನೆ! ಇದರಿಂದ ಪಾಕಿಸ್ತಾನದಲ್ಲಿ ತೀವ್ರತೆರನಾದ ದಂಗೆಗಳು ಭುಗಿಲೇಳುತ್ತವೆ.
ಇಮ್ರಾನ್ ಖಾನ್ ಬೆಂಬಲಿಗರು ಪಾಕಿಸ್ತಾನಿ ಸೇನೆಯ ಪ್ರಧಾನ ಕಚೇರಿ ಸೇರಿದಂತೆ ಮಿಲಿಟರಿ ನೆಲೆಗಳು ಮತ್ತು ಕಂಟೋನ್ಮೆಂಟ್ ಪ್ರದೇಶಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸುತ್ತಾರೆ.
ಪಾಕಿಸ್ತಾನದ ಸುಪ್ರೀಂ ಕೋರ್ಟ್ ಇಮ್ರಾನ್ ಖಾನ್‌ಗೆ ಜಾಮೀನು ನೀಡಿದರೂ ಭ್ರಷ್ಟಾಚಾರ, ಲಂಚ, ಸೇನೆಯ ವಿರುದ್ಧ ದಂಗೆಗೆ ಪ್ರಚೋದನೆ, ಕಾನೂನು ಉಲ್ಲಂಘನೆ ಮತ್ತು ಸರ್ಕಾರಿ ನೌಕರರ ಕೆಲಸಕ್ಕೆ ಅಡ್ಡಿಪಡಿಸುವಂತಹ ಸುಮಾರು 200 ಪ್ರಕರಣಗಳನ್ನು ದಾಖಲಿಸಿ ಇಮ್ರಾನ್ ಖಾನ್ ಶಾಶ್ವತವಾಗಿ ಜೈಲು ಖೈದಿಯನ್ನಾಗಿಸಲಾಗುತ್ತದೆ!
ಜೈಲು ಶಿಕ್ಷೆ ಮತ್ತು ಆರೋಪಗಳ ಸುರಿಮಳೆ
ಇಸವಿ 2023 ರಿಂದ ಜೈಲು ಬಂಧಿಯಾಗಿರುವ ಇಮ್ರಾನ್ ಖಾನ್ ಅಲ್-ಖಾದಿರ್ ವಿಶ್ವವಿದ್ಯಾಲಯ ಯೋಜನಾ ಟ್ರಸ್ಟ್‌ಗೆ ಸಂಬಂಧಿಸಿದ ಅಧಿಕಾರ ದುರುಪಯೋಗ ಮತ್ತು ಭ್ರಷ್ಟಾಚಾರಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ 14 ವರ್ಷ ಜೈಲು ಶಿಕ್ಷೆ ಮತ್ತು ಅವರ ಪತ್ನಿ ಬುಶ್ರಾ ಬೀಬಿಗೆ ಏಳು ವರ್ಷಗಳ ಜೈಲು ಶಿಕ್ಷೆ ವಿಧಿಸಿ ಕೋರ್ಟ್ ಆದೇಶ ನೀಡಿ ಕೈ ತೊಳೆದುಕೊಂಡಿದೆ.
ಇದರ ಜೊತೆಗೆ 1 ಮಿಲಿಯನ್ ಪಾಕಿಸ್ತಾನಿ ರೂಪಾಯಿಗಳಷ್ಟು ದೊಡ್ಡ ಮೊತ್ತವನ್ನು ಇಮ್ರಾಗี่ನ್ ಖಾನ್ ಮೇಲೆ ಕೋರ್ಟು ದಂಡದ ರೂಪದಲ್ಲಿ ವಿಧಿಸಿಯೂ ಆಗಿದೆ!
ಇಷ್ಟರ ನಡುವೆ ಇಮ್ರಾನ್ ಖಾನ್ ಮೇಲೆ ಇಸವಿ 2022 ರಲ್ಲಿ ವಾಜಿರಾಬಾದಿನಲ್ಲಿ ಗುಂಡಿನ ದಾಳಿ ಕೂಡ ಜರುಗಿತ್ತು!
ಇದು 2023ರಲ್ಲಿ ಮತ್ತೊಮ್ಮೆ ಪುನರಾವರ್ತನೆಯೂ ಆಯಿತು!
ಇಸವಿ 2022 ರಲ್ಲಿ ಅಧಿಕಾರದಿಂದ ಪದಚ್ಯುತಗೊಂಡ ನಂತರ ಅಲ್-ಕಾದಿರ್ ಟ್ರಸ್ಟ್, ತೋಶಾಖಾನಾ, ಸೈಫರ್ ಕೇಸ್‌ಗಳಲ್ಲಿ ಇಮ್ರಾನ್ ಖಾನ್ ಬಂಧನದಲ್ಲಿದ್ದಾರೆ.
2025ರಲ್ಲಿ ಸುಪ್ರೀಂ ಕೋರ್ಟ್ 8 ಕೇಸ್‌ಗಳಲ್ಲಿ ಬೇಲ್ ಮಂಜೂರು ಮಾಡಿದ್ದರೂ, ಇಮ್ರಾನ್ ಖಾನ್ ಇನ್ನೂ ಜೈಲಿನಲ್ಲಿಯೇ ಕೊಳೆಯುತ್ತಿದ್ದಾನೆ!
ಪಾಕಿಸ್ತಾನದ ಕೋರ್ಟಿನ ಆದೇಶಗಳಿಗೂ ಅಲ್ಲಿನ ಸೇನೆ ಕಿಮ್ಮತ್ತು ಕೊಡುತ್ತಿಲ್ಲ ಎನ್ನುವುದು ಇಮ್ರಾನ್ ಖಾನ್ ಪ್ರಕರಣದಲ್ಲಿ ಮತ್ತೊಮ್ಮೆ ಜಗಜ್ಜಾಹೀರಾಗಿದೆ!
ಅಂತಾರಾಷ್ಟ್ರೀಯ ಸಂಬಂಧಗಳಲ್ಲಿ ಇಮ್ರಾನ್ ಪಾತ್ರ
ಇನ್ನು ಇಮ್ರಾನ್ ಖಾನ್ ಬಂಧನದ ಬಳಿಕ ಜರುಗುತ್ತಿರುವ ಅಂತರಾಷ್ಟ್ರೀಯ ವಿದ್ಯಮಾನಗಳು ಪಾಕಿಸ್ತಾನವನ್ನು ನಿದ್ದೆ ಮಾಡುವುದಕ್ಕೂ ಬಿಡುತ್ತಿಲ್ಲ.
22 ಕೋಟಿ ಜನಸಂಖ್ಯೆಯ ಅಣ್ವಸ್ತ್ರ ಸಜ್ಜಿತ ಪಾಕಿಸ್ತಾನವು, ಅಫ್ಘಾನಿಸ್ತಾನ ಮತ್ತು ಚೀನಾದ ಆಡಳಿತಗಳೊಂದಿಗೆ ರಾಜತಾಂತ್ರಿಕ ಮೈತ್ರಿ ಹೊಂದಿದೆ.
ಇರಾನ್ ಒಟ್ಟಿಗೆ ಅಷ್ಟಕ್ಕಷ್ಟೇ ಎಂಬಂತೆ ಸಂಬಂಧ ಇರಿಸಿಕೊಂಡಿರರುವ ಪಾಕಿಸ್ತಾನ, ನೆರೆಯ ಭಾರತದೊಂದಿಗೆ ಮಾತ್ರ ತನ್ನ ದ್ವೇಷವನ್ನು ಯಥಾಸ್ಥಿತಿಯಂತೆ ಕಾಯ್ದುಕೊಂಡಿದೆ!
ಹೀಗಾಗಿಯೇ ಭಾರತವು ಪಾಕಿಸ್ತಾನದ ಎಲ್ಲ ಬೆಳವಣಿಗೆಗಳನ್ನೂ ಕುತೂಹಲದಿಂದ ಗಮನಿಸುವ ಜೊತೆಗೆ ಸಂಭವನೀಯ ಪರಿಣಾಮಗಳನ್ನು ವಿಶ್ಲೇಷಿಸುತ್ತಿರುತ್ತದೆ.
ಇಸವಿ 2018ರಲ್ಲಿ ಅಧಿಕಾರಕ್ಕೆ ಬಂದ ದಿನದಿಂದಲೂ ಇಮ್ರಾನ್ ಖಾನ್ ಅಮೆರಿಕ ವಿರೋಧಿ ಹೇಳಿಕೆಗಳನ್ನು ಒಂದಾದ ಮೇಲೆ ಒಂದರಂತೆ ನೀಡುತ್ತಲೇ ಹೋಗಿದ್ದು ಆತನ ಪದಚ್ಯುತಕ್ಕೆ ಬಹುದೊಡ್ಡ ವೇದಿಕೆಯನ್ನು ಸೃಷ್ಟಿಸಿತು.
ಚೀನಾದೊಂದಿಗೆ ಇನ್ನಷ್ಟು ಗಟ್ಟಿಯಾದ ಮೈತ್ರಿ ಮಾಡಿಕೊಳ್ಳುವ ಉತ್ಸಾಹ ತೋರಿದ್ದ ಇಮ್ರಾನ್ ಖಾನ್, ಉಕ್ರೇನ್ ಮೇಲೆ ರಷ್ಯಾ ದಾಳಿ ಮಾಡಿದ ದಿನವೇ ರಷ್ಯಾ ರಾಜಧಾನಿ ಮಾಸ್ಕೊದಲ್ಲಿ ತಂಗಿದ್ದ ವಿಚಾರ ತಿಳಿದು ಅಮೇರಿಕ ಸಿಟ್ಟಿಗೆದ್ದಿತ್ತು!
ಕೊನೆಗೆ ಅದು ಇಮ್ರಾನ್ ಖಾನ್ ಬಂಧನದ ತನಕ ತನ್ನ ಪರಿಣಾಮವನ್ನು ಬೀರಿತು ಎಂಬುದು ಈಗ ಗುಟ್ಟಿನ ಸಂಗತಿಯಲ್ಲ!
ಭಾರತ-ಪಾಕ್ ಸಂಬಂಧದಲ್ಲಿ ಇಮ್ರಾನ್ ಛಾಪು
ಇವೆಲ್ಲದರ ನಡುವೆ ಭಾರತ ಮತ್ತು ಪಾಕಿಸ್ತಾನದ ನಡುವಿನ ವಿರಸದಲ್ಲಿಯೂ ಇಮ್ರಾನ್ ಖಾನ್ ದೊಡ್ಡ ಮಟ್ಟದಲ್ಲಿ ಅಲ್ಲದಿದ್ದರೂ ಅಲ್ಪ ಪ್ರಮಾಣದಲ್ಲಿ ಮೂಗು ತೂರಿಸಿದ್ದ.
ಇಲ್ಲಿಯವರೆಗೂ ಬಾರತ ಮತ್ತು ಪಾಕಿಸ್ತಾನ ಮೂರು ಪೂರ್ಣ ಪ್ರಮಾಣದ ಯುದ್ಧಗಳನ್ನು ಕಂಡಿದ್ದನ್ನು ಚರಿತ್ರೆ ಕಾಪಿಟ್ಟುಕೊಂಡಿದೆ.
ಈ ಪೈಕಿ ಎರಡು ಯುದ್ಧಗಳು ಮುಸ್ಲಿಮರೇ ಬಹುಸಂಖ್ಯಾತರಾಗಿರುವ ಕಾಶ್ಮೀರ ಕಣಿವೆಯಲ್ಲಿ ಜರುಗಿಹೋಗಿದೆ. ಗಡಿ ನಿಗದಿ, ಭಯೋತ್ಪಾದನೆ ಸೇರಿದಂತೆ ಹಲವು ವಿಚಾರಗಳಲ್ಲಿ ಎರಡೂ ದೇಶಗಳ ನಡುವೆ ಸಾಕಷ್ಟು ಗೊಂದಲಗಳಿವೆ. ಎರಡೂ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧವೂ ಕನಿಷ್ಠ ಮಟ್ಟಕ್ಕೆ ನೆಲಕಚ್ಚಿದೆ.
ಆದಾಗ್ಯೂ ತನ್ನ ಅಧಿಕಾರದ ಕೊನೆಯ ದಿನಗಳಲ್ಲಿ ಇಮ್ರಾನ್ ಖಾನ್ ಭಾರತವನ್ನು ಹೊಗಳಿದ್ದರು. ಆದರೆ ಭಾರತದ ಆಂತರಿಕ ವಿದ್ಯಮಾನಗಳ ಬಗ್ಗೆ ಹಲವು ಬಾರಿ ನಾಲಿಗೆ ಹರಿಬಿಟ್ಟಿದ್ದರು. ಇದು ಎರಡೂ ದೇಶಗಳ ನಡುವಣ ವಿಶ್ವಾಸದ ಮೇಲೆ ಬಹುವಾಗಿ ಪರಿಣಾಮ ಬೀರಿತು.
ಎರಡೂ ದೇಶಗಳ ಶಾಂತಿಯ ಮಾತುಕತೆಗಳಿಗೆ ಇಮ್ರಾನ್ ಖಾನ್ ಅವಧಿಯಲ್ಲಿಯೂ ಪೂರಕವಾದ ವಾತಾವರಣ ಸಾಧ್ಯವಾಗಲಿಲ್ಲ ಎಂಬುದು ವಿಪರ್ಯಾಸ!
ಪಾಕಿಸ್ತಾನದ ವಿದೇಶಾಂಗ ನೀತಿ ಮತ್ತು ರಕ್ಷಣಾ ವಿದ್ಯಮಾನಗಳನ್ನು ಅಲ್ಲಿನ ಮಿಲಿಟರಿಯೇ ನಿರ್ವಹಿಸ Supplementsವ ಕಾರಣ ಇಮ್ರಾನ್ ಪದಚ್ಯುತಿಯಿಂದ ಭಾರತದ ವಿಚಾರದಲ್ಲಿ ಪಾಕಿಸ್ತಾನದ ನಿಲುವು ಬದಲಾಗುವುದು ಅಥವಾ ಇತರ ಯಾವುದೇ ಪ್ರಮುಖ ಬೆಳವಣಿಗೆ ನಡೆಯುವ ಸಾಧ್ಯತೆಗಳನ್ನು ಮತ್ತಷ್ಟು ಕಡಿಮೆ ಮಾಡಿತು ಎಂಬುದು ಕಾಕತಾಳೀಯವೇನಲ್ಲ!
ಇಮ್ರಾನ್ ಖಾನ್ ಬಂಧನದ ಬಳಿಕ ‘ಭಾರತವು ಒಪ್ಪಿದರೆ ಕಾಶ್ಮೀರ ವಿಚಾರದಲ್ಲಿ ಮಾತುಕತೆಗೆ ಪಾಕಿಸ್ತಾನ ಸಿದ್ಧವಿದೆ’ ಎಂದು ಪಾಕಿಸ್ತಾನದ ಅಂದಿನ ಸೇನಾಧಿಕಾರಿ ಜನರಲ್ ಖಮಾರ್ ಜಾವೇದ್ ಬಾಜ್ವಾ ಹೇಳಿದ್ದರು.
ಇದು ಅಷ್ಟು ಸುಲಭದ ಕೆಲಸವಲ್ಲ ಎಂಬುದು ಎರಡೂ ದೇಶಗಳಿಗೂ ಗೊತ್ತು. ಪಾಕಿಸ್ತಾನದ ಇಂತಹ ಮಾತುಗಳ ಹಿಂದೆ ನೂರೆಂಟು ಅರ್ಥಗಳಿರುತ್ತವೆ ಎಂಬುದು ಈಗ ಯಾರಲ್ಲಿಯೂ ಅನುಮಾನಗಳು ಉಳಿದಿಲ್ಲ.
ಚೀನಾ-ಪಾಕ್ ನಂಟು ಮತ್ತಷ್ಟು ಬಿಗಿಯಾಗುತ್ತಿದೆ
ಸಧ್ಯಕ್ಕಂತೂ ಪಾಕಿಸ್ತಾನದ ಮಿಲಿಟರಿ ಇಂಟೆಲಿಜೆನ್ಸ್ ಏಜೆನ್ಸಿ (ಐಎಸ್ಐ) ಮತ್ತು ಇಸ್ಲಾಮಿಕ್ ತೀವ್ರವಾದಿ ಗುಂಪಾಗಿರುವ ತಾಲಿಬಾನ್ ಆಡಳಿತಗಾರರ ನಡುವಣ ಸಂಬಂಧ ಹಳಸಿ ಚಿತ್ರಾನ್ನವಾಗಿದೆ.
ಕಾಬೂಲ್ ಗೆದ್ದು ಅಫ್ಘಾನಿಸ್ತಾನವನ್ನು ಕೈವಶ ಮಾಡಿಕೊಂಡರೂ ಎರಡರ ನಡುವಣ ಆರ್ಥಿಕ ಮತ್ತು ಅಧಿಕಾರದ ಬಿಕ್ಕಟ್ಟು ಶಮನಗೊಂಡಿಲ್ಲ.
ಕತಾರ್ ಹೊರತುಪಡಿಸಿದರೆ ಬೇರೆ ಯಾವುದೇ ದೇಶದಿಂದ ಅಫ್ಘಾನಿಸ್ತಾನಕ್ಕೆ ನೆರವು ಸಿಗುತ್ತಿಲ್ಲ.
ಪಾಕಿಸ್ತಾನವನ್ನೇ ನೆಲೆ ಮಾಡಿಕೊಂಡಿದ್ದ ತಾಲಿಬಾನಿಗಳು ಇದೀಗ ಪಾಕ್ ಆಡಳಿತವು ತಮ್ಮಿಂದ ದೂರ ಸರಿಯುತ್ತಿರುವುದನ್ನು ಗಮನಿಸಿ ಇನ್ನಷ್ಟು ಸಿಟ್ಟಿಗೆದ್ದಿದ್ದಾರೆ.
ಎರಡೂ ದೇಶಗಳ ಗಡಿಯಲ್ಲಿ ಆಗಾಗ ಸಂಘರ್ಷಗಳೂ ವರದಿಯಾಗುತ್ತಿದ್ದು ಸಾವುನೋವು ಸಾಮಾನ್ಯ ಎಂಬಂತೆ ಆಗಿದೆ.
ಪಾಕಿಸ್ತಾನದಲ್ಲಿ ಇಸ್ಲಾಮ್ ತೀವ್ರವಾದಿಗಳ ಉಪಟಳ ಹೆಚ್ಚಾಗುತ್ತಿರುವುದರಿಂದ, ಅಫ್ಘಾನಿಸ್ತಾನದಿಂದ ಒಳನುಸುಳುವಿಕೆ ಕಡಿಮೆಯಾಗಬೇಕು ಎಂದು ಪಾಕಿಸ್ತಾನವು ಜಾಗತೀಕ ಸಮುದಾಯವನ್ನು ಆಗ್ರಹಿಸುತ್ತಿದೆ.
ಪ್ರಧಾನಿಯಾಗಿದ್ದ ಅವಧಿಯವುದ್ದಕ್ಕೂ ಇಮ್ರಾನ್ ಖಾನ್ ತಾಲಿಬಾನ್ ಆಡಳಿತವನ್ನು ಹೆಚ್ಚು ಟೀಕಿಸಿರಲಿಲ್ಲ!
ಹೀಗೆ ಇಮ್ರಾನ್ ಖಾನ್ ದಿಸೆಯಿಂದ ಅಮೇರಿಕದಿಂದ ದೂರವಾಗುತ್ತಿದ್ದ ಪಾಕಿಸ್ತಾನಕ್ಕೆ ಚೀನಾ ದೊಡ್ಡ ಆಸರೆಯಾಗಿತ್ತು.
ಹೀಗಾಗಿಯೇ ಇಮ್ರಾನ್ ಖಾನ್ ಹಲವು ಬಾರಿ ಚೀನಾವನ್ನು ಹೊಗಳಿದಿದ್ದರು.
ಇಮ್ರಾನ್ ಖಾನ್ ಬಂಧನದ ಬಳಿಕವೂ ಪಾಕಿಸ್ತಾನ ಚೀನಾದೊಟ್ಟಿಗೆ ತನ್ನ ಸಂಬಂಧವನ್ನು ಸಾಕಷ್ಟು ವೃದ್ದಿಸಿಕೊಂಡಿದೆ.
60 ಶತಕೋಟಿ ಡಾಲರ್ ವೆಚ್ಚದ ಚೀನಾ-ಪಾಕಿಸ್ತಾನ್ ಆರ್ಥಿಕ ಕಾರಿಡಾರ್ (China-Pakistan Economic Corridor – CPEC) ಹೆಸರಿನ ಮಹತ್ವದ ಯೋಜನೆಯೊಂದು ಪಾಕಿಸ್ತಾನದಲ್ಲಿ ಈಗ ಸದ್ದಿಲ್ಲದೇ ಅನುಷ್ಠಾನಗೊಳ್ಳುತ್ತಿದೆ.
ಈ ಯೋಜನೆಗೆ ಒತ್ತಾಸೆಯಾಗಿ ಈಗಿನ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ನಿಂತಿಕೊಂಡಿದ್ದಾನೆ.
ಪಂಜಾಬ್ ಪ್ರಾಂತ್ಯದ ಸನಿಹದ ಪ್ರದೇಶಗಳ ಆಡಳಿತ ಚುಕ್ಕಾಣಿ ಹಿಡಿದಿದ್ದಾಗಲೂ ಹಲವು ಬಾರಿ ಶೆಹಬಾಜ್ ಷರೀಫ್ ಚೀನಾದೊಂದಿಗೆ ನೇರವಾಗಿ ಒಪ್ಪಂದಗಳನ್ನು ಮಾಡಿಕೊಂಡು ಹಲವು ಯೋಜನೆಗಳನ್ನು ತಂದಿದ್ದನು!
ಇಂಥವನೀಗ ಪ್ರಧಾನಿಯಾಗಿರುವಾಗ, ಪಾಕಿಸ್ತಾನ-ಚೀನಾ ನಂಟು ಮತ್ತಷ್ಟು ಬಿಗಿಯಾಗುತ್ತದೆಯೇ ಹೊರತು ಕಡಿಮೆಯಾಗುವುದಿಲ್ಲ!
ಭಾರತದ ಪಾಲಿಗೆ ಇದು ಅಷ್ಟು ಒಳ್ಳೆಯ ಬೆಳವಣಿಗೆಯಂತೂ ಅಲ್ಲ!
ಅಮೇರಿಕದ ಕಣ್ಣಿನಲ್ಲಿ ಇಮ್ರಾನ್
ಇವೆಲ್ಲದರ ನಡುವೆ ಉಕ್ರೇನ್-ರಷ್ಯಾ ಸಂಘರ್ಷ ನಿರ್ವಹಣೆಯಲ್ಲಿ ಸಿಲುಕಿರುವ ಅಮೇರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಪಾಕಿಸ್ತಾನದ ರಾಜಕೀಯ ಬೆಳವಣಿಗೆಗಳತ್ತ ಹೆಚ್ಚು ಗಮನ ಕೊಡುತ್ತಿಲ್ಲ.
ಆದರೆ ರಷ್ಯಾ ಕಾರಣದಿಂದಾಗಿ ಭಾರತ ಮತ್ತು ಅಮೇರಿಕ ಪರಸ್ಪರ ದೂರ ಆಗುತ್ತಿರುವುದನ್ನು ಅಲ್ಲಗೆಳೆಯುವಂತಿಲ್ಲ!
ಭಾರತದೊಂದಿಗಿನ ಸಂಬಂಧ ಸುಧಾರಣೆಗೆ ಮತ್ತು ತನ್ನ ತಾಳಕ್ಕೆ ತಕ್ಕಂತೆ ಭಾರತ ಕುಣಿಯುವಂತೆ ಮಾಡುವುದು ಅಮೇರಿಕದ ಸದ್ಯದ ಆದ್ಯತೆಯಾಗಿದೆ.
ಅಫ್ಘಾನಿಸ್ತಾನದಲ್ಲಿ ಅಮೇರಿಕ ಸೇನೆ ಇದ್ದಷ್ಟು ವರ್ಷವೂ ಪಾಕಿಸ್ತಾನದ ಬಗ್ಗೆ ಅಮೇರಿಕ ಮಹತ್ವ ಕೊಡುತ್ತಿತ್ತು.
ಆದರೆ ಇದೀಗ ಪಾಕಿಸ್ತಾನದೊಂದಿಗೆ ಉತ್ತಮ ಸಂಬಂಧ ಕಾಪಾಡಿಕೊಳ್ಳಲೇಬೇಕು ಎನ್ನುವ ಯಾವುದೇ ಒತ್ತಡ ಅಮೇರಿಕ ಮೇಲಿಲ್ಲ.
ಉಕ್ರೇನ್ ಮೇಲೆ ರಷ್ಯಾ ದಾಳಿ ನಡೆಸಿದ ದಿನವೇ ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ರಷ್ಯಾ ರಾಜಧಾನಿ ಮಾಸ್ಕೋದಲ್ಲಿ ವಾಸ್ತವ್ಯ ಹೂಡಿದ್ದು ಅಮೇರಿಕ ಇನ್ನೂ ಮರೆತಿಲ್ಲ.
ಹಾಗಾಗಿಯೇ ತನ್ನ ಪದಚ್ಯುತಿ ಮತ್ತು ಬಂಧನದ ಹಿಂದೆ ಅಮೇರಿಕ ಸಂಚು ರೂಪಿಸಿದೆ ಎಂದು ಇಮ್ರಾನ್ ಖಾನ್ ಕೊರ್ಟಿನ ಮೊಗಸಾಲೆಯಲ್ಲಿಯೇ ಚೀರಾಡಿ ಹೇಳಿದ್ದು ಇನ್ನೂ ಪಾಕಿಸ್ತಾನದ ತುಂಬಾ ಮಾರ್ದನಿಸುತ್ತಿದೆ!
ಹೀಗೆ ಪಾಕಿಸ್ತಾನದ ಪ್ರಧಾನಿಯಾಗಿ ಅಮೇರಿಕ, ರಷ್ಯ, ಭಾರತ ಮತ್ತು ಆಫ್ಘಾನಿಸ್ತಾನ ದೇಶಗಳ ನಡುವೆ ಒಂದೊಂದು ರೀತಿಯ ಸಂಬಂಧವಿರಿಸಿಕೊಂಡಿದ್ದ ಇಮ್ರಾನ್ ಖಾನ್, ತನ್ನ ಸುಧಾರಿಕರಣ ಚಿಂತನೆಗೆ ಬಳಸಿದ ವೇಗದ ಕಾರಣಕ್ಕೆ ಪದಚ್ಯುತಗೊಂಡು ಜೈಲು ಸೇರಿದ್ದಾಗಿದೆ.
ಹತ್ಯೆ ಆರೋಪ: ಜಗತ್ತೇ ಕಂಪಿಸುವ ಸುದ್ದಿ
ಆದರೆ ಬಲೂಚಿಸ್ತಾನ ರಾಜತಾಂತ್ರಿಕ ಕಚೇರಿಯು, ಪಾಕಿಸ್ತಾನದಲ್ಲಿ ಬಂಧನದಲ್ಲಿರುವ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಅವರನ್ನು ಅಸಿಮ್ ಮುನೀರ್ ಮತ್ತು ಅವರ ಐಎಸ್ಐ ಆಡಳಿತವು ಕೊಂದಿದೆ ಎಂದು ತನ್ನ ‘X’ ಖಾತೆಯಿಂದ ಟ್ವೀಟ್ ಮಾಡಿ ಇಡೀ ಜಗತ್ತು ಕಂಪಿಸುವಂತೆ ಮಾಡಿದೆ.
ಪಾಕಿಸ್ತಾನಿ ಮೂಲಗಳನ್ನು ಉಲ್ಲೇಖಿಸಿ ಅಫ್ಘಾನಿಸ್ತಾನ್ ಟೈಮ್ಸ್ ಕೂಡ ಇಮ್ರಾನ್ ಖಾನ್ ಹತ್ಯೆಯ ವರದಿ ಮಾಡಿದೆ.
ಈ ವರದಿಯಿಂದ ಇಮ್ರಾನ್ ಖಾನ್ ಅವರ ಕುಟುಂಬವು ಕಂಗಾಲಾಗಿದೆ. ಅವರ ಮೂವರು ಸಹೋದರಿಯರು ಕಳೆದ 21 ದಿನಗಳಿಂದ ಜೈಲಿನ ಹೊರಗೆ ಕಾಯುತ್ತಿದ್ದಾರೆ. ಯಾರಿಗೂ ಅಡಿಯಾಲ ಜೈಲಿಗೆ ಪ್ರವೇಶಿಸಲು ಅವಕಾಶ ನೀಡುತ್ತಿಲ್ಲ. ಅಲ್ಲದೆ, ಅವರನ್ನು ಪಾಕಿಸ್ತಾನ ತೊರೆಯುವಂತೆ ಒತ್ತಡ ಹೇರಲಾಗಿದೆ!
ಖೈಬರ್ ಪಖ್ತುನ್ಖ್ವಾ ರಾಜ್ಯದ ಮುಖ್ಯಮಂತ್ರಿ ಸೊಹೈಲ್ ಅಫ್ರಿದಿ ಏಳು ಬಾರಿ ಇಮ್ರಾನ್ ಖಾನ್ ಭೇಟಿ ಮಾಡಲು ಪ್ರಯತ್ನಿಸಿದರೂ ಫಲಪ್ರದವಾಗಿಲ್ಲ!
ಹಾಗೇನಾದರೂ ಇಮ್ರಾನ್ ಖಾನ್ ಜೈಲಿನಲ್ಲಿಯೇ ಹತ್ಯೆಯೇ ಆಗಿದ್ದರೇ, ಜಾಗತೀಕ ಸಮುದಾಯ ಬಹುಶಃ ಪಾಕಿಸ್ತಾನವನ್ನು ಜಗತ್ತಿನ ಭೂಪಟದಿಂದ ಅಳಿಸಿ ಹಾಕುವ ಎಲ್ಲಾ ಸಾಧ್ಯತೆಗಳು ನಿಚ್ಚಳವಾಗಿ ಗೋಚರಿಸುತ್ತಿವೆ!
-ಇರ್ಫಾನ್ ಮುದಗಲ್
