ವಿಜಯನಗರ (ಹೊಸಪೇಟೆ): ಜಿಲ್ಲೆಯ ತುಂಗಭದ್ರಾ ನದಿಪಾತ್ರ, ಹಳ್ಳ, ನದಿಗಳ ಪಾತ್ರದಲ್ಲಿ ಲಭ್ಯವಿರುವ ಹಡಗಲಿ, ಹರಪನಹಳ್ಳಿ ತಾಲ್ಲೂಕಿನ 8 ಮರಳು ಬ್ಲಾಕ್‍ಗಳಿಗೆ ಕರೆದಿದ್ದ ಇ-ಟೆಂಡರ್ ಗೆ ಧಾರವಾಡ ಹೈಕೋರ್ಟ್‍ ಪೀಠ ಟೆಂಡರ್ ಪ್ರಕ್ರಿಯೆಗೆ ತಡೆ ನೀಡಿ ಮಧ್ಯಂತರ ಆದೇಶ ಹೊರಡಿಸಿದೆ.
ಇ ಟೆಂಡರ್ ಮೂಲಕ ವಿಲೇವಾರಿಪಡಿಸಲು ಏಪ್ರಿಲ್ 5 ರಂದು ರಾಜ್ಯ ಸರ್ಕಾರ ರಾಜ್ಯಪತ್ರದ ಮೂಲಕ ಅಧಿಸೂಚನೆ ಜಾರಿಗೊಳಿಸಿತ್ತು. ಅದರನ್ವಯ ಗಣಿ, ಭೂ ವಿಜ್ಞಾನ ಇಲಾಖೆಯು ಆ.12ರಂದು ಪತ್ರಿಕಾ ಪ್ರಕಟಣೆ ಹೊರಡಿಸಿ, ಹೂವಿನ ಹಡಗಲಿ ತಾಲ್ಲೂಕಿನ ಹರವಿ-203 (2 ಕೇಂದ್ರ), ಕೊಂಬಳಿ-294 (2), ಹಕ್ಕಂಡಿ-286, ಕಡತಿ 316, , ಹಿರೆಬನ್ನಿಮಟ್ಟಿ 296, ನಿಟ್ಟೂರು 113 ಬ್ಲಾಕ್‍ ಗಳಲ್ಲಿ ಆಯಾ ಪ್ರದೇಶಕ್ಕೆ ಅನುಗುಣವಾಗಿ ಎಕರೆವಾರು ನಿಗಧಿಪಡಿಸಿ ಅರ್ಜಿ ಕರೆದಿತ್ತು.
ಕೆಪಿಪಿಪಿ ಕಾಯ್ದೆ ಅನ್ವಯ ಟೆಂಡರ್ ಆಹ್ವಾನಿಸಿ 90 ದಿನದೊಳಗೆ ಅರ್ಜಿ ವಿಲೇವಾರಿ ಪಡಿಸಬೇಕಿತ್ತು. ಆದರೆ ಅವಧಿ ಪೂರ್ಣಗೊಂಡು ಅರ್ಜಿ ವಿಲೇಪಡಿಸದ ಸರ್ಕಾರದ ವಿಳಂಬ ನೀತಿ ಖಂಡಿಸಿ, ಕೆಲ ಅರ್ಜಿದಾರರು ನ್ಯಾಯಾಲಯದ ಮೊರೆ ಹೋಗಿದ್ದರು. ಅರ್ಜಿ ಪರಿಶೀಲಿಸಿರುವ ನ್ಯಾಯಪೀಠ, ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳಿಗೆ ನೊಟೀಸ್ ಜಾರಿಗೊಳಿಸಿ, ಇ ಟೆಂಡರ್ ಪ್ರಕ್ರಿಯೆ ಮುಂದುವರಿಸದಂತೆ ಮಧ್ಯಂತರ ಆದೇಶ ನೀಡಿದೆ ಎಂದು ಅರ್ಜಿದಾರ ಹೊಂಬಾಳೆ ರೇವಣ್ಣ ಮಾಹಿತಿ ನೀಡಿದ್ದಾರೆ. ನ್ಯಾಯಾಲದಲ್ಲಿ ದಾಖಲಾಗಿರುವ ಅರ್ಜಿ ಸಂಖ್ಯೆ WP/0108830/2025 ಆಗಿದ್ದು, ಮುಂದಿನ ವಾಯಿದೆ ಡಿಸೆಂಬರ್ 4 ರಂದು ಜರುಗಲಿದೆ.
